O Ᾱ Siapo ma Fala Lalaga?
Aʻoaʻo e Uiga i Siapo
O Atumotu o le Pasefika
O le talafa’asolopito o Atumotu o le Pasefika o se tala o le sogasogā, ma’ema’e, fa’ato’ilalogatā, ma aiga..
Ina ua fausia paopao e tusa o le 5,000 tausaga ua mavae, na malaga ni vaega o tagata totoa i le sami e sa’ili nisi nu’u fou mai le tele o motu o paepae i le vasa loloa. E le’i taofia latou e le vasa, ae na avea ma auala e feso’ota’i ai ma sa’ili ai mālo. O ē na fa’ato’aina nei nu’u na tapu’e le laueleele mo fa’ato’aga ma le tamāoaiga ua o’o mai lava i aso nei. Na tumau lo latou feso’ota’i i aiga ma nisi alaalafaga e ala i fefa’ataua’iga ma fesuia’i meaalofa. Ina ua o’o mai mālo o Europa i tausaga o le 1500, na fa’afeiloa’i atu e ni tagata fōlau, ali’i totoa, faifa’ato’aga maoa’e, ma ni alaalafaga ola ma le feuluulufa’i a latou so’otaga.
O lenei fa’afanua e lē avatu ai ni tuāoi aloa’ia pe fa’aletulafono o ni atunu’u mai anamua, pe aofia atu ai fo’i le tele o motu ma aganu’u i lenei vasa. O igoa o lo’o tusi atu e fa’ailoa ai le tele o atunu’u ma teritori na aumai ai siapo ma fala lalaga o lo’o tā’ua i lenei fa’aaliga.
Ulua’i Tagata Faimalaga ma Ē Na ‘Ainā Ai
E manatu o ulua’i tagata na ‘ainā ai Atumotu o le Pasefika na la’asia laueleele i le itu i matū o Ausetalia aga’i i Niu Kini e lē itiiti ifo i le 40,000 tausaga ua mavae, ae iai fa’amaoniga o tagata na gāsolo i sasa’e o le Atu Solomona na amata mai ni vaega o tagata fōlau i le itu i saute o Saina pe ā ma le 5,000 tausaga ua mavae. Na fa’aaogā le la, fetu, agi o matagi, āuāu o le sami, ma le felelei o manu e ta’ita’i ai o latou paopao; o nei tagata fōlau maoa’e na aumaia la’au totō ma manu, na mafai ai ona nonofo ma ola le tele o tupulaga i le afe ma afe o motu i Osiēniā.
Siapo, Samoa, aoina i se vaitaimi o le 1910. 57.8 x 47.3 in. NHM A.8371.64-340
O le vasa ma le fa’ailo tautai o ni vaega tāua o aganu’u i Osiēniā, ma o nei ‘autū o lo’o fa’aali mai i siapo. O le siapo Samoa lenei e tusia i le amataga o le 1900 ona aso. E iloa atu ni fetu ma ni galu i mamanu i luga o le siapo lenei?
Ata o le paopao fa’ata’ita’i, Setete Fa’afeterale o Maikeronesia, aoina i le 1940. 32.9 x 22.8 x 30.1 in. NHM A.9635.72-46
O le paopao e fa’amoemoe i le lagolago opeopea (po’o le ama) e pipi’i atu i le tino o le va’a e mau ai. O le ata lenei o lo’o fa’aalia mai ai se tasi ituaiga paopao, a’o nisi ituaiga e aofia ai paopao ma o latou ama fa’apipi’i i itu uma e lua, pe soso’o fo’i ni va’a se lua ma se vaega i le ogatotonu e nonofo ai. O fala lalaga nini’i na fa’aaogā e fai ai la.
Fiti, 1890. NHM A.5204.42-67 B
Outrigger canoe technology has remained virtually unchanged for thousands of years and continues to be used by Pacific Islanders and other seafaring cultures around the world. This image shows a crew on a Fijian camakau (single outrigger canoe).
Ata fa’ailo folau, Atu Malesala, 1940. 27.6 x 24.2 x 1.2 in. NHM A.9635.72-1
O tagata fa’ailo folau na fa’ato’aina Osiēniā na latou fa’aaogāina le si’omaga e tata’i ai lo latou ala. O le “ata fasila’au” a Malesala lea, e fausia mai pulu o le popo ma atigi pule, o lo’o fa’aali mai ai le fa’ata’atiaga o le matagi ma galu, fa’apea fo’i motu tuāoi o lo’o fa’aali mai i pule. E lē avea ata nei i se malaga, ae tauloto lelei e le tautai fa’ailo folau ae le’i tu’uva’a
O Pule o Latou Si’omaga
O le malamalama ma iloa ola i totonu ma sui o latou si’omaga ina ia lagolago i mana’oga o ona tagata, o le ki lena o le atia’e o aganu’u olaola o Atumotu o le Pasefika. Mai le pulea o le sami ma ona punā’oa ina o fa’ato’ā ‘ainā e o’o i le atia’e o faiga faifa’ato’aga, e tofu lava le vaipanoa ma auala maoa’e e fa’amasani ai ma tapu’e o latou si’omaga ina ia lagolago ai le ola o ona tagata.
Ata: Ashay vb, 2019. Wikicommons, CC BY-SA 4.0
O nisi motu o le Pasefika e lautele atu ma eseese mea e maua i o latou si’omaga nai lo isi. O tagata na mua’i ‘ainā ai motu, na fa’alagolago i figota ma manu ‘aivao, fa’apea fo’i ma nisi la’au totō mai fafo pei o talo, umala, ulu, fa’i ma niu; e le’i umi ae maua ai taumafa mautū.
O le fa’ailo folau iloga o Mau Piilug (Motu o Satawal, Setete o Yap) ma Steve Thomas o lo’o mātau ma a’oa’o le lagi, 1983. Ata: Steve Thomas. Fa’aputuga ua Fa’akomepiuta a le Faletusi UHM
O le pulea o fogāeleele ta’itasi o motu o le Pasefika ma fua e maua ai na lagolagoina le atia’e o ni aganu’u tutasi ma fa’amalosia ai le feso’ota’i i le va o alaalafaga o i motu. O lona i’uga o se talafa’asolopito umi o feso’ota’iga ma so’otaga i le va o atumotu eseese o le Pasefika.
Ata: Molly Des Jardin, 2010
E tele vaipanoa o motu o le Pasefika ua sui o latou laueleele ma atia’e faiga e totō ai la’au ua fa’amili. Ua ta’i vai e fa’asūsū ai eleele mātūtū, pu’e mo ufi, ma laumafola ua eli i tafā mauga, mo fa’ato’aga e lagolago ai le fa’ato’ateleina o tagata.
Pupu talo, Yap, Setete Fa’afeterale o Maikeronesia. Ata: Amy Gusick, 2018
O le ma’umaga lea i le taufusi i le motu o Yap na tu’ufa’asolo ma va’ai e augatupulaga. E iai fo’i le vaega a ma’umaga i le mamanu o siapo – e iai atunu’u latou te fa’aaogāina ma’umaga taufusi e lolō ai fasi u’a ina ia maua le lanu enaena malosi pe uliuli.
Siapo, Pago Pago, Samoa (Amerika Samoa i aso nei), aoina i le 1935. 35.2 x 35.2 in. NHM A.10768.82-5
E ta’atele ata o le natura i siapo ma e ta’u mai ai le so’otaga loloto o le tele o tagata ma o latou si’omaga. O nei ata o le si’omaga e foliga sauatoa i tagata mai fafo, ae iloa lelei e tagata o vaipanoa o le Vasa Pasefika. O le siapo Samoa lea, mo se fa’ata’ita’iga, e foliga mai e iai ni vaega o ni la’au totō.
Ata na pu’eina e le auva’a o le Expedition 18, International Space Station, 2009, NASA ISS018-E-18129
O le si’omaga o se popolega tāua o lo’o iai pea i tagata Atumotu o le Pasefika. O motu pei o Atafu, Tokelau, o lo’o feagai ma le fa’atetele o le leai o se timu, lologa i le talafātai, solo, ma le suiga o le maualuga o le sami. O le maualuga o le laueleele o Atafu e na’o le ono-ma-le-afa futu i luga a’e o le sami, ua lē mautinoa le umi o se nonofo ai. Ina ia fesoasoani ia malamalama i nei a’afiaga, o le tele o mālo o le Pasefika ua avea ma totino o le vaega a Mālo Aufa’atasi e ta’ua o le Tulaga Atia’e o Motu Laiti (SIDS), o lo’o sa’ili i ni auala ‘anoa ma le aogā e lagolago ai o latou totino.
Fa’akolone, Fa’afitauli, ma le Aveeseina o Punā’oa
E tele aganu’u i Atumotu o le Pasefika i aso ua mavae e iai o latou fa’auluuluga, o le ali’i sili e fai ma ta’ita’i. Ina ua fa’ato’ā taunu’u tagata mai Europa i atumotu o Osiēniā i se vaitaimi o le 1500, latou te le’i taliaina pe aloa’ia tulaga ia o nu’u, ma na amata ai i’ina ni senturi e tele o le sosopo i fanua ma aganu’u na olaola mo tausaga e afe ma afe. Ina ua fa’aauau pea le o atu o sui o mālo o Europa ma Amerika, tagata militeli, misionare, tagata faioloa, foma’i, tagata faigaluega o kamupanī, ma tagata asiasi, na latou faia ni suiga i motu o le atuvasa e tumau e fa’avavau.
O le fa’aputuga o siapo ma fala lalaga i le NHMLAC o se vaega o lenei talafa’asolopito. Mai fitafita ma tagata foma’i e o’o i tagata faigaluega o kamupanī o ē na aveesea mai ni vaega o punā’oa, e tele ni tagata asiasi na latou aoina ni measina mai lotoifale o nei nu’u. O le tele o nei mea na toe fa’ameaalofa i falemata’aga i Europa ma Amerika - e aofia ai ma NHMLAC – ua tupu mai ai se fa’aputuga e o’o ona a’a i aso o kolone ma ua atia’e i se va’aiga a se tagata mai fafo i le aganu’u.
Jacques’Nicolas Bellin, “Répresentation du cours ordinaire des vents de traverse qui regnent sur les côtes dans la grande Mer du Sud” (1753). O le fa’aputuga o Fa’afanua o Talafa’asolopito/ Faletusi o Princeton
Ina ua iloa e mālo paoā fa’akolone i Europa, le Iunaite Setete, ma Asia le aogā o le ta’atiaga o motu o le Pasefika mo faiga fa’amālo ma taulaga e toe fa’atumu ai a latou sapalai i auala o fefa’ataua’iga, na amata loa lona fa’atu a latou nofoaga mo mea e fai i nisi motu, ma aumai fa’atasi ai ma ni aganu’u matuā ese lava, fa’atasi ma le vevesi, taua, ma fa’ama’i.
Siapo, Samoa, aoina i se vaitaimi o le 1909. 33.5 x 32.5 in. NHM A.8371.64-338
O Falani, Siāmani, Peretania, Sepania, Holani, Potukale, le Iunaite Setete, ma Iapani e tofu uma ma motu o le Pasefika latou te pulea, e amata mai i le 1800, ma o lo’o fa’aauau mai pea nisi e o’o mai i le asō. O le siapo Samoa lenei o lo’o iai vaega o le fu’a US i luga ma masalo na gaosia i se vaitaimi ina ua fa’ato’ā tuana’i le 1899, ina ua vaevae Samoa e Siāmani, Peretania, ma le Iunaite Setete iā Samoa Siāmani (o Samoa Tuto’atasi i le taimi nei) ma Amerika Samoa; o lo’o tumau pea lona tulaga lē pipi’i i se atunu’u.
O le si’ilima o le fuāva’a Siāmani, e lē iloa po’o ai le pu’eata, Harwich, UK, 1918. © IWM Q 20616
Na matuā a’afia Atumotu o le Pasefika i le Taua Muamua o le Lalolagi ma le Taua Lona Lua. I le fa’ai’uga o le Taua Lona Lua, na taofia pea e mālo malolosi mai fafo motu na latou iai i taimi o le taua. Sa fa’aofi mai ni talitonuga o ni aganu’u fou i le tele o nei motu mai atunu’u pei o Siāmani, Iāpani, ma le Iunaite Setete e fa’aauala mai i lo latou fai mai o lo’o fesoasoani i atumotu nei ina ia fa’amasani i le lalolagi fa’aneionapo.
O tama’ita’i tausima’i o lo’o fai le tui o le yaws i se tamaitiiti i le motu Ulithi i le Setete Fa’afeterale o Maikeronesia, 1945. Ata: U.S. Navy. Fa’aputuga Fa’akomepiuta a le Faletusi o le UHM.
Fa’atasi ma talitonuga fou, na aumai fo’i e pulega fa’akolone ia fa’ama’i pei o le misela ma le fulū. O le fa’ama’i misela tele o le 1875 na oti ai le 33% o tagata i Fitii ma le fa’ama’i fulū tele o le 1918 na oti ai tagata e i le va o le 4% ma le 22% o Fiti, Toga, Guam, Tahiti, ma Samoa.
Siapo, Samoa, aoina i se vaitaimi o le 1909. 51.4 x 47.4 in. NHM A.8371.64-355
O le tele o siapo o i le NHM sa foa’i ane e foma’i militeli sa iai i le itu lea mo le tausiga o fitafita Amerika. Na fesoasoani fo’i nei foma’i i tagata o nu’u ina ua pesi fa’ama’i na avatu e tagata mai fafo. O le siapo Samoa lea e fa’aali atu i’ī na foa’i mai e le Atimalala Rossiter, o le Foma’i Aoao lona 18 o le Navy, na tautua i Samoa i le amataga o le 1900.
Si’itia ese tagata o le Motu o Bikini. E lē iloa le pu’eata, Atu Malesala, 1946, NHM A.5564.46-58.1
I le va o le 1946 ma le 1958, the fa’apa e le Iunaite Setete pomu niukilia e 67 i luga ma fa’ata’amilo i le motu o Bikini i le Atu Malesala. Ae le’i fa’apaina pomu, na mua’i si’itia e le militeli a le US tagata o le motu i le isi motu o Rongerik, o le motu tu’ufua e manatu tagata Bikini e tumu i agaga leaga.
Si’itia ese tagata o le Motu o Bikini. E lē iloa le pu’eata, Atu Malesala, 1946, NHM A.5564.46-58.5
Ina ua uma tausaga e lua o le toetoe a momole, na toe si’itia tagata Bikini i le isi motu o Kwajalein, ona soso’o lea ma le motu o Kili. E o’o mai i le asō, o lo’o tumau pea le lē nofoia o le motu o Bikini ona o le maualuluga o le fua o le malosi fa’aniukilia.
O le ausa’alo ma le ipu popo, Motu o Bikini, Atu Malesala, aoina i le 1946. Tauagavale: 33.5 x 9.5 x 10.8 in. NHM A.5564.46-16 Taumatau: 5.0 x 5.0 x 5.0 in. NHM A.5564.46-27
O ni vaega o mea fa’aaganu’u o i le Falemata’aga na aumai i fale o Bikini na matuā fa’aleagaina. O le Ta’ita’iau o Harold W. Grieve na feagai ma le vaega a le Navy na auina e si’itia tagata Bikini. Na foa’i mai e Grieve siapo ma nisi mea, pei o le ausa’alo ma le ipu popo o lo’o i le ata. Na ia foa’iina mai fo’i ni ata e tele o lo’o molimauina ai le si’itiaga o tagata Bikini i le motu o Rongerik.
E lē iloa le Tagata Pu’eata, Nauru, 2014
O le talafa’asolopito o le fa’akoloneina i Osiēniā o se tala fo’i o le so’onafai ma avesesē punā’oa. Fa’ata’ita’iga, eliina o le fosefate i Nauru na fa’atāma’ia ai le motu, ma tu’ua ai le laufanua na’o amu laulaututū, aemaise le fa’avaivaia o mea ‘anoa o le laueleele ma le sami ona o le tafe ese atu o le oneone ma le fosefate.
Ato ma le palasi, Nauru, aoina i se vaitaimi o le 1920. Tauagavale: 11.8 x 3.7 x 6.3 in. NHM A.5772.47-14 Taumatau: 8.9 x 1.2 in. NHM A.5772.47-7
O nisi na foa’i mai i le fa’aputuga a Atumotu o le Pasefika i le NHM o tagata na galulue fa’akonekarate po’o foma’i mo kamupanī na eliina le fosefate, suāu’u, ma nisi punā’oa i Atumotu o le Pasefika.
O le ato lea ma le palasi na fa’aaogā e u’u ai le tino o le tamaitiiti i le suāu’u o le popo na aoina mai e tagata faigaluega fa’afoma’i, o ē na galulue mo le Pacific Phosphate Mining Co. i Nauru.
Fa’asalalauina o Atumotu o le Pasefika
[Siapo ma fala lalaga] ua fa’aaogaina e avea ma fa’ailoga o aganu’u, ma e tāua ona afai e lē mafai e se isi ona iai i lona atunu’u ma ola i lana aganu’u i aso uma, o le iai la o nei fa’ailoga va’aia e matuā tāua lava. E fa’aopoopoina nisi uiga o nei mea tāua i ē o nonofo ese mai o latou atunu’u. – Katrina Talei Igglesden (Fiti)
—Katrina Talei Igglesden (Fiti)
O aso nei, e to’atele tagata e tutusa a latou aganu’u po’o atunu’u, a’o lo’o nonofo solo i le lalolagi. E ta’ua o Nu’u Fa’asalalauina, e matuā tetele vaega fa’apea i Aotearoa (Niu Sila), Ausetalia, ma le Iunaite Setete. O Kalefonia ua avea ma aiga o nisi toetoe a atoa le 25% o le 1.2 miliona Tagata Maoli (Tagatānu’u Hawai’i) ma Tagata Atumotu Pasefika o lo’o nonofo nei i le Iunaite Setete. O tagata nei e matuā taofi mau so’otaga ma o latou atunu’u moni, ma tausi lo latou igoa e ala i le fa’aauau o agaifanua e pei o le faimeaalofa i siapo ma fala lalaga. E ui ina tofu le atunu’u ma a latou aganu’u, ae iai mea e tutusa ai, e pei o le tāua o siapo ma fala lalaga nini’i, e maua i le tele o fale o aiga Atumotu o le Pasefika ua salalau mai fafo.
Siapo, Toga, aoina i se vaitaimi o le 1954. 152.0 x 75.6 in. NHM F.A. 2725.87-1
I Toga, o le masani ta’atele le fa’aaogā o siapo e fai ma fala e momoe ai. O se masani lena na fai pea e le aiga e ona le siapo Toga lenei ina ua si’itia mai i le Iunaite Sete i le ogatotonu o le 1900.
Ata fa’aaloalo a Asena Taione-Filihia
O siapo ma fala lalaga nini’i o se vaega tāua o le tele o sauniga fa’apitoa o Atumotu o le Pasefika, i totonu ma fafo mai o Atumotu. O le ata lenei, na pu’e i Kalefonia i Saute, o lo’o fa’aali mai ai nisi na auai atu i le fa’ailogaina o le 21 tausaga o se tama’ita’i Toga, o lo’o la’ei i siapo ma fala lalaga nini’i.
Ata o le fa’aaloalo a Asena Taione-Filihia
I fafo mai o Hawai’i, o Los Angeles ma ona nu’u tuāoi uma o lo’o iai le fa’apotopotoga aupito to’atele o tagata Atumotu o le Pasefika ua salalau mai, o lo’o nonofo i totonu o le Iunaite Setete. Ina ia lagolagoina nei alaalafaga, e tele ni fa’alapotopotoga eseese i totonu o le vaipanoa lea. O le ata lenei o se fa’atasiga sa fai a le MALO (Avanoa mo Ta’ita’i e Fa’ama’ite Gaoioiga), o se fa’alapotopotoga lē sa’ili ai ni polōfiti ae tautua Tagata Toga Amerika i nu’u tutotonu o le Mālo e ala i le fautua o tupulaga talavou, saunia mo galuega, tusitusiga tau punā’oa, ma fa’atasiga fa’aleaganu’u.
Ata o le fa’aaloalo a Tafesilafa'i Pacific Islander Festival
O le Fa’aaliga a Atumotu Pasefika e ta’ua o le Tafesilafa’i, e faia i Long Beach, o se fa’aaliga mo Tagata o Atumotu Pasefika e o mai fa’atasi ai e fefa’asoaa’i tala, manatu, ma punā’oa. O nei fiafiaga e fa’aali ai tu ma aganu’u eseese ma le felanulanua’i o alaalafaga o Atumotu Pasefika i Kalefonia. E maua ai fo’i e fa’alapotopotoga a Atumotu o le Pasefika o lo’o i Kalefonia i Saute le avanoa e feso’ota’i atu atu i ni tagata e sili ona to’atele.
O le a’oga i le faiga o le siapo Toga. Ata: o le fa’aaloalo a Asesna Taione-Filihia
O le tele o fa’alapotopotoga a Atumotu o le Pasefika latou te ofoina atu a’oga o se latou tautua ‘autū. E ō fa’atasi ma vasega tau soifua malolōina, sitiseni, fa’ata’ita’i i galuega, ma nisi., e tele fa’alapotopotoga latou te ofo atu fo’i ni vasega fa’amasani e taula’i i le fa’asao o le aganu’u, e aofia ai le faiga o le siapo.
FA'AFETAI
E fia fa’afetai atu le Falemata’aga o le Talafa’asolopito O Mea o le Natura a le Itumālo o Los Angeles i totino nei mo lo latou lagolagoina o lenei fuafuaga: Audrey Alo, Cindi Alvitre, Juliann Anesi, Katrina Talei Igglesden, Fran Lujan, Kirisitina Sailiata, Tavae Samuelu, Kelani Silk, Lolofi Soakai, Asena Taione-Filihia, ma Craig Torres. Ua mafai ona fa’atinoina se vaega O le ‘Ie o Alaalafaga ona o se alagātupe tele mai le Oa Fa’amatu’u a le Mālo mo Mataupu Tau Tagata (NEH): E poloa’iina e le Temokalasi le atamai. O ni lagona, mea ua maua, fa’ai’uga, po’o ni fautuaga o avatu i lenei fa’aaliga e lē fa’apea o manatu na o le NEH.