O le ‘Ie o Alaalafaga

Read in English

Ia te a’u, o le Siapo, o se auala e fa’amatala ai le ola ma o se fa’amatalaga e mafai ona taua’aoina.

—Katrina Talei Igglesden (Fiti)

O le Siapo (u’a) ma fala lalaga e gaosia mai pulu ma moi’a’a o la’au o lo’o faia i alaalafaga o le lalolagi atoa, aemaise lava i le tele o agaifanua a Atumotu o le Pasefika. I le talafa’asolopito e masani ona fa’aaoga e la’ei ai ma teuteu ai tino, o nisi aogā, o nei ‘ie e fa’aali maia le fa’aaloalo, feso’ota’iga, ma aiga; ma e masani fo’i ona faimeaalofa ai i fa’aipoipoga, maliu, ma nisi tulaga tāua o le soifuaga.

E amana’ia siapo ma fala lalaga e le Falemata’aga o le Talafa’asolopito o Mea o le Natura a le Itumālo o Los Angeles (NHMLAC)-o lenei fa’aaliga i le initaneti, ua alafia ona o se alagātupe mai le ‘Oa Fa’amatu’u a le Mālo mo Mataupu Tau Tagata’, ua fa’ailoga ai le taimi muamua ua matou tu’uina atu ai le avanoa mo le tele o lenei fa’aputuga. I la matou pa’aga ma ē faufautua mai alaalafaga o Atumotu Pasefika i Kalefonia i Saute, matou te fa’amoemoe e fa’ailoa atu la matou fa’aputuga o siapo ma fala lalaga i ni tagata e to’atele, ma ia avea fo’i o se punā’oa aogā mo so’o se tasi e iai sona so’otaga ma nei fa’atusa ofoofogia o aganu’u a Atumotu o le Pasefika.

O se tasi fa’amoemoe o lenei fa’aaliga e ta’u atu ai le talafa’asolopito o la matou fa’aputuga. O siapo ma fala lalaga o i le NHMLAC sa tele ina fa’atau, fa’afesuia’i, pe foa’i mai; ae o le fa’aputuga na mafua mai i le fa’akoloneina o Atumotu o le Pasefika e Amerika ma Europa, na i’u ina fa’aleagaina ai le tele o tu ma masani fa’aaganu’u. Sa tele ina tu’ufa’atasia e nisi e iai le malamalamaga o tagata i fafo atu o aganu’u a Atumotu o le Pasefika. Sa’ili atili e uiga i le talafa’asolopito o le fa’aputuga, ma/po’o auala o lo’o matou uia fa’atasi ma alaalafaga o Atumotu Pasefika e togafitia, folasia, ma fa’amatala nei measina tāua e tu’ufa’asolo mai tua’ā.

Matou te talia ni manatu ma lagona i la matou fa’aputuga po’o lenei fa’aaliga, fa’apea fo’i ni tala po’o fa’amatalaga e ono fia fa’asoa mai e uiga i siapo ma fala lalaga. Fa’amolemole ‘auai mai i le alaalafaga.

ACKNOWLEDGEMENTS 

E fia fa’afetai atu le Falemata’aga o le Talafa’asolopito O Mea o le Natura a le Itumālo o Los Angeles i totino nei mo lo latou lagolagoina o lenei fuafuaga: Audrey Alo, Cindi Alvitre, Juliann Anesi, Katrina Talei Igglesden, Fran Lujan, Kirisitina Sailiata, Tavae Samuelu, Kelani Silk, Lolofi Soakai, Asena Taione-Filihia, ma Craig Torres. Ua mafai ona fa’atinoina se vaega O le ‘Ie o Alaalafaga ona o se alagātupe tele mai le Oa Fa’amatu’u a le Mālo mo Mataupu Tau Tagata (NEH): E poloa’iina e le Temokalasi le atamai. O ni lagona, mea ua maua, fa’ai’uga, po’o ni fautuaga o avatu i lenei fa’aaliga e lē fa’apea o manatu na o le NEH.